عريس بنتى

ما اعتذرش في اليوم ده، ولا اللي بعده. لكن بعد أسبوع، حصل موقف ما كنتش أتوقعه. غادة جاتلي لوحدها، من غير أمها. قعدت قدامي، وكانت باين عليها إنها ما نامتش كويس من أيام. قالت يا طنط، أنا عارفة إنك مش طايقاني، وعارفة إنك عندك حق. قلت لها أنا مش بكرهك يا غادة. أنا زعلانة من اللي حصل. دموعها نزلت وقالت أنا خسړت كتير بسبب اللي عملته. كريم اعتذر بأدب، وقال إنه مش هيكمل معايا، لأنه ما ينفعش يبدأ جوازه وهو حاسس إن القرار اتاخد بالطريقة دي. وأنا مش زعلانة منه، أنا زعلانة من نفسي. سكتت شوية، وبعدين كملت ماما لسه شايفة إن ندى السبب، وكل يوم تقولي إنكم سرقتوا مني الفرحة. بس أنا عارفة إن ده مش حقيقي. أنا كنت عايزة أتجوز بأي طريقة، وما فكرتش في أختي. بصيت لها وقلت يا بنتي، الجواز مش سباق. وإنتِ مش أقل من ندى عشان عريس ما كملش معاكي. بس لازم تعرفي إن فرحتك ما ينفعش تقوم على ۏجع غيرك. هزت راسها وقالت أنا عايزة أعتذر لندى. ناديّت ندى، وجت وقفت عند الباب، وأول ما غادة شافتها، قامت من مكانها. قالت بصوت مكسور أنا آسفة يا ندى. مش هطلب منك تنسي اللي حصل، لكن أنا عايزة تعرفي إني غلطت. ندى فضلت ساكتة لحظات، وبعدين قالت أنا مش هقدر أرجع أثق فيكي زي الأول في يوم وليلة.

بس لو إنتِ فعلًا ندمانة، أثبتي ده بتصرفاتك، مش بالكلام. غادة هزت راسها، ومشيت من غير ما تطلب منها تسامحها فورًا. أما سعاد، ففضلت فترة طويلة شايفة إننا السبب في كل حاجة، لكن مع الوقت بدأت تفهم إن بنتها هي كمان دفعت ثمن قراراتها. وبعد شهور من التعارف والسؤال والاتفاق، كريم اتقدم لندى رسمي من جديد. المرة دي، ندى هي اللي اختارت، وهي اللي وافقت، وهي اللي حددت مع كريم التفاصيل اللي تهمها. وفي يوم قراءة الفاتحة، البيت كان مليان أهل وأصحاب، وأنا واقفة جنب بنتي، بظبط لها طرحتها وببص لوشها اللي كان منور. جوزي كان قاعد بعيد شوية، ساكت، ومش عارف يبصلي في عيني. بعد ما الضيوف مشيوا، ندى راحت له وقعدت جنبه. قالت يا بابا، أنا مش عايزة أعيش وأنا شايلة منك. إنت أبويا، ومهما حصل هتفضل أبويا. بس اللي حصل وجعني، ومش عايزة يتكرر معايا ولا مع إخواتي. جوزي فضل ساكت، وبعدين قال بصوت واطي أنا غلطت يا ندى. كانت أول مرة أسمعه يقولها بالشكل ده. كمل كنت فاكر إني لما أرضي أم غادة، هحافظ على البيت، وما فهمتش إني كده بهدمه من جوه. أنا ظلمتك، وظلمت أمك، ومش هطلب منك تنسي اللي حصل، لكن أتمنى تسامحيني مع الوقت. ندى دمعت عينيها، وقالت أنا مسامحاك يا بابا، بس أتمنى أشوف التغيير في أفعالك.

جوزي هز راسه، ومد إيده يمسك إيدها. أنا كنت واقفة عند باب الصالون، ودموعي بتنزل من غير ما أحس. مش لأن كل حاجة بقت مثالية، ولا لأن السنين اللي فاتت اتمسحت في لحظة، لكن لأن بنتي أخيرًا قدرت تقول لأبوها إنها بتحبه من غير ما تسمح له يظلمها. وفي يوم فرحها، وأنا بلبسها فستانها الأبيض، مسكت وشي بإيديها وقالت إنتِ عارفة يا ماما، أكتر حاجة كنت خاېفة منها مش إن كريم يروح مني. سألتها أمال إيه يا حبيبتي؟ قالت كنت خاېفة أصدق إن قيمتي أقل من غادة، لمجرد إن بابا اختارها مكاني. حضنتها بقوة، وقلت لها إنتِ قيمتك مش في عريس اختارك ولا في أب فضّلك على غيرك. إنتِ قيمتك في نفسك، وفي أخلاقك، وفي إنك ما ظلمتيش حد حتى وإنتِ مظلومة. ابتسمت ندى، ومسحت دموعها. وبعد ما خلص الفرح، وشفتها ماشية جنب جوزها وهي مبسوطة، بصيت للقاعة اللي كانت من شهور شاهدة على أصعب ليلة في حياتنا. الليلة اللي دخلتها وأنا فاكرة إن بنتي هت،نهار، خرجت منها وهي بتتعلم إزاي تقف على رجليها. أما غادة، فبعد فترة بدأت تركز في شغلها وتوسع دايرة معارفها، ولما جه لها عريس مناسب بعد كده، وافقت عليه بإرادتها، واتجوزت من غير ما تحتاج تزاحم أختها على مكانها. وسعاد، رغم إن علاقتنا ما رجعتش زي الأول، بطلَت تتدخل في كل قرار يخصني ويخص عيالي، خصوصًا بعد ما أحمد وإخواته وقفوا معايا ووضحوا لأبوهم إن البيت مش هيفضل ماشي على حساب طرف واحد.