شارع البحر

قالتله أنا مش همضي على حاجة أنا معملتهاش شريف قرب منها وقال بصوت منخفض لكنه مليان تهديد يبقى إنتي اللي تختاري يا تمضي يا إما تمشي من هنا من غير مستحقاتك إيمان ردت وهي بتحاول تثبت صوتها أنا اشتغلت تعبي كله بالحلال ومش هتنازل عن حقي شريف ضحك بسخرية وقال حقك ده أنا اللي أحدده هنا في اللحظة دي قومت من مكاني واتجهت ناحية الكاونتر وقلت بصوت هادي هو فيه مشكلة يا أستاذ شريف لف وبصلي باحتقار إنت تاني يا عم إنت مش قولنا المكان ده مش مناسب ليك بصيتله بهدوء وقلت أنا جاي أشرب قهوة مش أكتر رد بعصبية مش هتتشرب هنا اتفضل بره إيمان بصتله بصدمة وقالت يا أستاذ شريف ماينفعش تطرد زبون بالشكل ده صرخ فيها إنتي مالكيش دعوة أنا بتكلم مع مين وبعدين مد إيده ناحية الورقة وقالها آخر مرة هقولك امضي مديت إيدي وخدت الورقة من على الكاونتر قبل ما إيمان تلحق تمنعه بصيت فيها بسرعة ولقيت إنها إقرار مكتوب فيه إن إيمان استلمت كل مستحقاتها المالية وإنها بتتنازل عن أي شكوى سابقة ضد الإدارة رفعت عيني لشريف وقلتله هي ليه تمضي على إنها استلمت فلوسها وهي بتقول إن ليها مستحقات لسه ماخدتهاش شريف اتنرفز وخطف الورقة من إيدي إنت مالكش دعوة بالشغل هنا ابتسمت

وقلتله عندك حق أنا ماليش دعوة بالشغل هنا وبعدين ضفت بس واضح إن فيه ناس كتير مالهاش دعوة ومع ذلك بتدفع تمن أخطائك وشه احمر من الغضب وقال بره حالا وإلا هطلب لك الشرطة هزيت راسي وقلتله اطلبها يا أستاذ شريف وأنا هكون مستنيك لأول مرة شفت الخوف يعدي في عينيه للحظة لكنه حاول يخفيه بسرعة دخل مكتبه وخبط الباب وراه إيمان فضلت واقفة مكانها بتبصلي باستغراب قلت لها بهدوء عايز أتكلم معاكي شوية لو تسمحي هزت راسها وقالت حاضر يا فندم بس مش هنا سألتها فين قالتلي فيه كافيه صغير في الشارع الجانبي أنا بخلص شغلي الساعة أربعة ولو حضرتك موجود ممكن نتكلم هناك وافقت وسبتها ترجع شغلها لكن قبل ما أخرج من المكان لاحظت إن شريف واقف ورا زجاج مكتبه وبيتكلم في التليفون وهو بيبص ناحيتي كنت متأكد إنه بيبلغ حسام إن فيه حد بدأ يقرب من الحقيقة وده بالضبط اللي كنت عايزه الساعة أربعة إلا ربع كنت واقف قدام الكافيه الصغير اللي قالتلي عليه إيمان وصلت بعد شوية وهي شايلة شنطة قديمة وملامحها متوترة قعدنا على ترابيزة بعيدة عن الناس وطلبتلها حاجة تشربها بصتلي وقالت أنا عارفة إن حضرتك هتستغرب من اللي هقوله بس أنا مش عايزة أظلــ,,ـــــم حد قلتلها أنا مش جاي أظلــ,,ـــــم حد يا إيمان

أنا جاي أعرف الحقيقة سكتت شوية وبعدين بدأت تحكي من حوالي تلات شهور لاحظت إن شريف بيطلب مننا نكتب في الدفاتر إن فيه خامات ناقصة أو طلبات اتلغت مع إن الطلبات دي كانت بتتسلم للزبائن عادي في الأول افتكرت إن دي أخطاء في الحسابات لكن لما راجعت الإيصالات اكتشفت إن فيه فلوس بتدخل الدرج وبعدين بتختفي من التقرير اليومي سألتها بلغتي حد قالتلي أيوه قدمت شكوى للإدارة بس بعد يومين شريف عرف إني أنا اللي قدمتها واستدعاني مكتبه وقاللي إنه يقدر يخليني أخسر شغلي وأي مكان تاني في طنطا مش هيشغلني قلتلها وعشان كده سحبتي الشكوى هزت راسها وقالت كان عندي سبب تاني بصتلها وسألتها إيه هو طلعت من شنطتها ظرف بني قديم وحطته قدامي قالتلي أمي تعبانة وبتعمل جلسات علاج كل أسبوع وأنا اللي بصرف عليها وعلى أخويا الصغير وأي يوم من غير شغل بيفرق معانا فتحت الظرف ولقيت صور لإيصالات وتحويلات مالية وصور من دفاتر الحسابات سألتها إنتي احتفظتي بكل ده ليه قالتلي عشان كنت خايفة في يوم من الأيام يلبسوني أنا الغلط كله ولما حصلت مشكلة في الحسابات شريف بدأ يلمح إن الموظفين هما اللي بيسرقوا بصيت في الصور كويس ولاحظت إن فيه تحويلات متكررة لحساب باسم شركة توريدات سألتها الشركة دي تبع مين قالتلي مش عارفة