عربية عفش

نسرين قربت مني ورفعت الموبايل في وشي وقالت بصوت عالي
يا جماعة شوفوا الظلــ,,ـــــم بعينيكم دي واحدة كانت مرات أخويا وبتطرده هو وأهله وعايزة ترميهم في الشارع بعد ما أخدت منه كل حاجة

بصيت للموبايل وقلت
صوري براحتك يا نسرين بس اتأكدي إنك تصوري كل الكلام مش الجزء اللي يناسبك بس
اتعصبت وقالت
إنتي بتهدديني
قلتلها
لأ أنا بقولك الحقيقة
في اللحظة دي مروان ساب العمال وقرب مننا وهو بيقول
خلاص بقى يا رانيا إحنا اتفقنا على كل حاجة وماما هتاخد الأوضة الكبيرة وأنا هاخد أوضة المكتب ونسرين هتقعد في الجناح اللي فوق

بصيتله باستغراب شديد
إنت بتوزع أوض شقتي على نفسك وعلى أهلك من إمتى
رد بمنتهى الثقة

من دلوقتي يا ستي إحنا مش غرب عنك
قلتله
بالنسبة ليا إنتوا مش غرب فعلًا لكن ده مايديكوش الحق تدخلوا بيتي غصب عني
دولت رفعت إيديها في الهوا وقالت
يا نهار أسود على قلة الأصل أنا كنت فاكرة إنك بنت أصول لكن واضح إنك كنتي مستنية اليوم اللي تخلصي فيه من ابني علشان تطردي عيلته

كنت هرد عليها لكن في اللحظة دي الضابط قرب مننا وقال
يا جماعة من فضلكم كل واحد يتكلم بهدوء إحنا محتاجين نفهم المشكلة
اتوجهت ناحيته وقلت باحترام
حضرتك أنا رانيا فؤاد ودي شقتي وأنا صاحبتها ومفيش أي حد من الموجودين عنده إذن مني بالدخول أو نقل أي حاجة جواها

الضابط سألني
معاكي ما يثبت الملكية
قلتله
أيوه وكل المستندات موجودة مع محاميتي وهي جاية في الطريق
دولت ضحكت باستهزاء وقالت
ملكية إيه بس يا حضرة الظابط ابني كان عايش هنا خمس سنين والشقة دي من حقه زي ما هي من حقي أنا كمان

الضابط بص لها وقال
يا مدام محدش يقدر يدخل مكان بالقوة لمجرد إنه كان ساكن فيه قبل كده لازم نتأكد من المستندات الأول
لكن دولت ماعجبهاش الكلام وبدأت تعلي صوتها
إنتوا كلكم واقفين ضدي ليه أنا ست كبيرة ومحتاجة مكان أقعد فيه بدل ما أتبهدل في الشارع

بصيتلها وقلت
هو أنا اللي خرجتك من بيتك يا طنط دولت ولا إنتي اللي قررتي تيجي هنا من غير ما تسأليني
ماعرفتش ترد للحظة لكنها رجعت تصرخ تاني
إنتي قلبك ميت ومش حاسة بحد
كنت على وشك أرد لما عربية هالة وقفت ورا عربيتي

نزلت منها وهي شايلة ملف كبير وفي إيدها ظرف مختوم
أول ما دولت شافتها ابتسمت ابتسامة واثقة وقالت
أهلًا بالمحامية أهو دلوقتي هنعرف مين فينا صاحب الحق
هالة مااهتمتش بكلامها واتجهت ناحيتي الأول
إنتي كويسة يا رانيا
هزيت راسي وقلت
أيوه أنا كويسة
بعدها التفتت لدولت وقالت

مساء الخير يا مدام دولت أنا الأستاذة هالة منصور محامية رانيا وقبل ما أي حد ينزل كرتونة واحدة من عربيات النقل محتاجين نتكلم في نقطة مهمة جدًا
دولت شبكت إيديها قدام صدـ,,ـــرها وقالت بثقة
إحنا عارفين كل حاجة ومش محتاجين حد يشرح لنا حقوقنا