عربية عفش

الموضوع للأسف أكبر من مجرد محاولة بيع لأن فيه مراسلات بتوضح إن الأستاذ شريف كان بيحاول يقنع أكتر من شخص إن الشقة هتكون تحت تصرفه بعد الطلاق وإن العيلة هتنتقل للإقامة فيها بمجرد ما إجراءات الانفصال تخلص
دولت بصت لابنها وقالت

يعني إنت اللي قلتلنا ننقل العفش النهارده
شريف اتوتر وقال
أيوه يا ماما لأن رانيا كانت موافقة من الأول
بصيتله بصدمة
أنا وافقت إمتى
رد بسرعة
إنتي عارفة إننا اتكلمنا في الموضوع قبل كده
قلتله

إحنا اتكلمنا عن إنك تاخد حاجتك الشخصية من الشقة قبل الطلاق لكن عمرنا ما اتكلمنا عن إن أهلك ينقلوا عفشهم ويسكنوا عندي
هالة أخرجت نسخة من اتفاق الطلاق وقالت
وده كمان إقرار موقع من الأستاذ شريف قبل إنهاء إجراءات الطلاق بيأكد فيه إن الشقة ملك رانيا وحدها وإنه مش هيطالب بأي حق فيها ولا هيسمح لأي شخص يدخلها من غير موافقتها

دولت بصت للورقة وبعدين بصت لابنها
إنت مضيت على الكلام ده
شريف سكت
هنا ملامح دولت اتغيرت تمامًا
الست اللي كانت من شوية بتزعق وبتطالب بمفاتيح شقتي بقت مش عارفة حتى تبص في وش ابنها
قالتله بصوت مرتعش
إنت جايبني هنا ليه يا شريف

رد بعصبية
علشان محتاجين مكان نقعد فيه يا ماما
قالتله
لأ أنا بسألك إنت جايبني هنا ليه وبتقول لي إن الشقة من حقك وإني هقدر أعيش فيها وأبقى مرتاحة وبعدين تطلع كل الأوراق دي موجودة

شريف حاول يقرب منها وقال
يا ماما أنا كنت متأكد إن الموضوع هيتحل
دولت رجعت خطوة لورا وقالت
يتحل إزاي وإنت مضيت على ورق بيقول إن الشقة مش ملكك
مروان رمى الورقة على الكبوت بتاع عربية النقل وقال
أنا مش مصدقك يا شريف أنا كنت فاكر إنك مرتب كل حاجة وإننا هننقل ونبدأ حياة جديدة لكن واضح إنك كنت بتضحك علينا كلنا

نسرين بدأت تعيط وقالت
يعني أنا فضحت نفسي قدام الجيران وصورت رانيا وقلت إنها بتطردنا من بيتنا وفي الآخر إحنا اللي جايين نقتحم شقتها

بصيتلها وقلت بهدوء
إنتي اللي اخترتي تصوري من غير ما تسمعي مني كلمة واحدة يا نسرين
قالتلي وهي بتمسح دموعها
أنا آسفة يا رانيا بس شريف قال لنا إن كل حاجة متفق عليها
قلت لها
كان ممكن تسأليني قبل ما تتهميني بالظلــ,,ـــــم
نسرين هزت راسها وهي مش قادرة ترد

في اللحظة دي شريف حاول يلم الموضوع وقال
خلاص يا جماعة كفاية كلام إحنا مش هنقف هنا نتخانق قدام الناس خلينا نمشي وكل واحد يروح لحاله
لكن هالة قالتله
قبل ما تمشي لازم تعرف إن موكلتي هتحتفظ بكل المستندات وهتتخذ الإجراءات القانونية المناسبة لو حصلت أي محاولة تانية لدخول الشقة أو التصرف فيها من غير موافقتها

شريف بصلي وقال بحدة
إنتي هتعملي فيا محاضر بعد خمس سنين جواز
بصيتله بثبات وقلت
أنا مش بعمل فيك حاجة يا شريف إنت اللي اخترت تعمل كل ده وأنا دلوقتي بحمي حقي
قال بسخرية
حقك حقك هو ده كل اللي بتفكري فيه
رديت عليه

أيوه حقي لأنك طول خمس سنين كنت فاكر إن سكوتي ضعف وإن كل مرة أتنازل فيها عن حاجة علشان البيت يستمر معناها إنك تقدر تاخد اللي إنت عايزه
سكت لحظة وبعدين كملت
أنا كنت بحاول أحافظ على جوازنا لكن الجواز انتهى ومش هسمحلك تستخدم العشرة اللي بينا علشان تستولى على حاجة تخصني