جواز مزيف

### روايات مشيره محمد
### النهاية الكاملة لقصة نادية وحسام النجار
أول ما وصلنا البيت حسام دخل أوضة الملابس وبدأ يفك ساعة إيده ويحطها على التسريحة زي ما كان بيعمل كل يوم
بصلي من المراية وقال
ـ إنتي مالك يا نادية النهارده من ساعة ما خرجنا من الحفلة وإنتي ساكتة على غير عادتك

كنت واقفة بفك الحلق من ودني وببص لنفسي في المراية
نفس الوش اللي رسم ابتسامة قدام مئات الناس من شوية
نفس الست اللي قضت سبع سنين تحاول تخلي الراجل اللي اتجوزته يبقى أحسن نسخة من نفسه
بس الفرق إن الست دي ماتت من كام ساعة واللي واقفة مكانها دلوقتي واحدة تانية خالص
رديت بهدوء
ـ مفيش يا حسام بس صدعت شوية
قرب مني وحط إيده على كتفي
ـ طب ما قولتيلي كنت خليتك تمشي بدري

بصيت لإيده اللي على كتفي وافتكرت ضحكته وهو بيقول لصحابه إنه نفض الجوازة دي من زمان
إيده اللي كانت بالنسبة لي أمان بقت تقيلة على جسمي كأنها إيد واحد غريب
شلت إيده بالراحة وقلت
ـ متشغلش بالك أنا هنام دلوقتي
بصلي باستغراب لكنه مردش
دخل الحمام وبعد ما سمعت صوت المية شغال طلعت موبايلي وفتحت المدــ,,ـــــادثة بيني وبينه

سبع سنين من الرسائل
سبع سنين من صباح الخير يا حبيبي
وصلت المكتب؟خلي بالك من نفسك
العشا جاهز
وحشتني
كنت فاكرة إني ببني بيت بالكلام ده لكن اكتشفت إني كنت بكلم نفسي

فتحت الصور القديمة
صورة يوم كتب الكتاب
صورة أول عيد ميلاد ليه بعد الجواز
صورة وإحنا بنفتتح أول مطعم ليه
في كل صورة كنت واقفة جنبه مبتسمة وفخورة بيه
وهو في كل صورة كان بيبص للكاميرا مش ليا
قفلت الموبايل ومسحت دمعة واحدة نزلت غصب عني

مش عشان خسرت حسام
لكن عشان زعلت على نادية اللي ضيعت سبع سنين من عمرها وهي بتحاول تثبت لراجل مش بيحبها إنها تستاهل الحب
وقتها أخدت أول قرار حقيقي في حياتي
مش هواجهه
مش هصرخ في وشه
ومش هطلب منه تفسير

أنا هسيبه يكمل التمثيلية اللي هو فاكر إنه بطلها لحد ما الست اللي كان بيستهين بيها تخرج من حياته وتسيبه يواجه نفسه لوحده
تاني يوم صحيت قبله
عملت قهوتي وقعدت في البلكونة
فتحت اللابتوب وبدأت أراجع ملفات الشركات اللي كنت بساعده فيها من أول يوم

حسام كان فاكر إني مجرد زوجة شاطرة في تنظيم الحفلات وعندها علاقات اجتماعية كويسة
لكنه نسي إني قبل ما أعرفه كنت بشتغل في إدارة المشروعات وإن أبويا الله يرحمه علمني إن الفلوس مش هي اللي بتصنع القوة

القوة الحقيقية إنك تعرف كل جنيه داخل منين وكل ورقة ماضي عليها معناها إيه
أول شركة أسسها حسام كانت شركة شحن صغيرة
كان عنده عربية نقل واحدة ومكتب في شارع جانبي في مدينة نصر
أنا اللي ساعدته يظبط حساباته وأرتب له العقود وأراجع عروض الأسعار

أنا اللي عرفته على أول عميل كبير من خلال واحد من معارف أبويا
وبعدها الشركة كبرت وفتحنا شركة مقاولات ومطاعم وشركة أمن خاصة
على الأقل ده اللي كنت فاكرة إننا بنعمله سوا
لكن وأنا براجع الملفات اكتشفت إن في حاجات كتير اتغيرت من غير ما أعرف

شركات اتأسست بأسماء مختلفة
حصص اتنقلت
عقود اتجددت
ومبالغ كبيرة خرجت من حسابات شركات ورجعت دخلت في حسابات تانية
ما اتهمتوش بحاجة لمجرد الشك
أنا كنت عايزة الحقيقة بالأوراق مش بالتخمين
اتصلت بالمحاسب القانوني اللي كان بيتعامل معانا من سنين واسمه أستاذ شريف