جواز مزيف

بصيتله مباشرة
ـ أنا مش هجاوب على سؤال إنت اللي لازم تجاوب عليه
اتغيرت ملامحه
ـ إنتي عايزة توصلي لإيه؟ـ عايزة أعرف حقوقي وأفهم المستندات اللي تخصني
ـ بعد سبع سنين جواز تقوليلي الكلام ده؟الجملة دي كانت كفاية إنها تخليني أبتسم بمرارة

ـ أيوه يا حسام بعد سبع سنين جواز اكتشفت إنك كنت بتقول لصحابك إنك نفضت للجوازة دي من زمان وإن أنا الوحيدة اللي مش فاهمة الفولة
وشه اتغير تمامًا
فضل ساكت ثواني وبعدين قال
ـ إنتي كنتي واقفة بره المكتب؟ـ أيوه

ـ وسمعتي الكلام كله؟ـ سمعته كفاية
بدأ يمشي في الصالة بعصبية
ـ إنتي فهمتي الكلام غلط
بصيتله من غير ما أتكلم
كمل بسرعة
ـ أنا كنت بهزر معاهم يا نادية وإنتي عارفة إن الرجالة ساعات بتتكلم بطريقة مش مقصودة

سألته بهدوء
ـ كنت بتهزر لما قلت إنك نفضت للجوازة من زمان؟ـ كنت متضايق من مشاكل الشغل
ـ وكنت بتهزر لما قلت إني لسه بحاول أنقذ الجوازة لوحدي؟ـ أنا ما قلتش إني مش بحبك
ـ طيب بتحبني يا حسام؟

اتسمر مكانه
لأول مرة ما لاقاش إجابة جاهزة
فضل يبصلي كأنه بيدور على الجملة اللي تخلص الموقف من غير ما يتحمل مسؤولية أي حاجة
وبعدين قال
ـ إنتي مراتي وأم بيتي وليكي مكانة كبيرة عندي
هزيت راسي
ـ أنا ما سألتكش عن مكاني في البيت أنا سألتك إذا كنت بتحبني

سكت
والسكون اللي حصل كان أوضح من أي اعتراف
قلتله
ـ خلاص يا حسام أنا فهمت
لفيت عشان أمشي لكنه مسك دراعي
ـ استني إنتي مش هتخرجي من الكلام ده بالشكل ده

بصيت لإيده
ـ سيب إيدي
سابها فورًا لما شاف نظرتي
قلتله
ـ أنا مش هعمل فضيحة ولا هكلم حد ولا هحاول أنتقم منك قدام الناس لكن من النهارده كل واحد فينا مسؤول عن نفسه وعن حقوقه
قال بعصبية
ـ يعني إيه؟

ـ يعني مش هراجع شغلك ولا هحل مشاكلك ولا هستخدم علاقاتي عشان أفتحلك أبواب إنت مش عارف تدخلها لوحدك
ضحك باستخفاف
ـ إنتي فاكرة نفسك إيه من غيري يا نادية؟الجملة دي وجعتني أكتر من كل اللي سمعته في الحفلة

مش لأنها حقيقية لكن لأنها كشفت إنه كان شايف كل اللي عملته مجرد خدمة مفروض أقدمها له
بصيتله وقلت
ـ هتعرف قريب
ودخلت أوضتي وقفلت الباب
من اليوم ده بدأت حياتنا تتغير فعلًا
بطلت أراجع مواعيده
بطلت أتصل بيه أسأله هيرجع إمتى

بطلت أفتكر تفاصيل اجتماعاته وأسماء الناس اللي لازم يرضيهم
ولو سألني عن حاجة تخص شغله كنت بقوله
ـ اسأل المختص يا حسام
في البداية افتكر إني بعمل حركة عشان أخوفه
كان يدخل البيت متأخر ويستنى إني أسأله عن يومه

ولما ما أسألوش كان يقولي
ـ إنتي مش مهتمة تعرفي أنا كنت فين؟أرد وأنا بقلب في كتاب
ـ لو عندك حاجة تحكيها احكي
كان يتعصب ويقول
ـ هو إنتي بقيتي كده ليه؟وأنا ما كنتش برد
لأن المشكلة ما كانتش إني بقيت شخص تاني