جواز مزيف

أول ما رد قلتله
ـ صباح الخير يا أستاذ شريف محتاجة أقابلك النهارده في موضوع مهم
قال باستغراب
ـ خير يا مدام نادية في حاجة حصلت؟ـ مش عارفة لسه بس محتاجة مراجعة كاملة لحساباتي وأي مستندات تخص الشركات اللي ليا فيها صفة قانونية

سكت لحظة وبعدين قال
ـ طبعًا يا فندم بس الأفضل نحدد بالظبط الشركات والمستندات المطلوبة
ـ تمام هبعتلك التفاصيل بعد ما أراجع الورق
قفلت معاه وبدأت أعمل قائمة بكل شركة وعقد وحساب أقدر أطلب مراجعته بشكل قانوني
وبعدها اتصلت بالمحامية اللي كانت بتراجع عقود شغلي قبل الجواز

اسمها داليا
لما سمعت صوتي قالت بضحكة
ـ يا بنتي إنتي فين من سنين؟ حسام خطفك مننا ولا إيه؟ابتسمت لأول مرة ابتسامة حقيقية
ـ تقريبًا يا داليا بس أنا راجعة أهو

ـ طب تعالي نتغدى سوا
ـ لا أنا عايزة أشوفك في المكتب عندك موضوع مهم
نبرة صوتي خلتها تسكت
ـ تعالي فورًا
بعد الضهر كنت قاعدة قدام داليا بحكيلها كل اللي حصل
ما حكيتلهاش عن كل رسالة ولا كل موقف صغير لكن حكيتلها الجملة اللي سمعتها بنفسي

لما خلصت كلامي بصتلي وقالت
ـ إنتي متأكدة إنك مش عايزة تواجهيه؟ـ أنا عايزة أواجه الحقيقة الأول
ـ وعايزة توصلي لإيه بالظبط؟بصيت لها بثبات
ـ عايزة أعرف إيه اللي باسمي وإيه اللي باسمه وإيه اللي اتعمل من ورايا ولو في حقي حاجة مش هسيبها

هزت راسها بإعجاب
ـ كده أنا أعرف نادية اللي كنت بشتغل معاها زمان
فتحت درج مكتبها وطلعت ورقة وبدأت تكتب فيها المستندات اللي هنحتاجها
ـ بس خلي بالك يا نادية في فرق بين إنك تحمي حقك وإنك تدخلي حرب لمجرد الانتقام أنا هساعدك في الأول لكن التاني ده مش هيفيدك

رديت من غير تردد
ـ أنا مش عايزة أضره يا داليا أنا بس مش هسمحله يضرني تاني
رجعت البيت قبل حسام بساعة
دخلت المطبخ وطلبت الأكل اللي بيحبه
مش عشان كنت لسه بحبه بنفس الطريقة لكن عشان ما كنتش عايزة أغير أي حاجة بشكل يخليه يشك

لما دخل البيت بص للأكل وقال
ـ إيه ده إنتي عاملة كل ده ليه؟ـ عادي قلت أعملك حاجة بتحبها
قعد وبصلي
ـ أهو كده يا نادية أنا كنت حاسس إنك متغيرة
حطيت الطبق قدامه وقلت
ـ يمكن كنت محتاجة أرتب شوية حاجات في دماغي
ضحك

ـ يا ستي رتبي براحتك بس بلاش نكد
الكلمة دي كانت كفاية إنها تفكرني قد إيه هو متعود يحول أي إحساس عندي لحاجة تافهة
لكن ابتسمت وقلت
ـ حاضر
فضل يحكيلي عن اجتماع مهم عنده وإن في صفقة كبيرة هيقفلها الأسبوع الجاي
كنت بسمعه كويس

ولما ذكر اسم شركة جديدة سألته بكل عادية
ـ هي الشركة دي تبعكم ولا شراكة مع حد؟رفع عينه ليا
ـ إنتي بتسألي ليه؟ـ عشان الاسم جديد عليا
ـ آه دي شركة لسه بنجهزها مع طارق
ـ ربنا يوفقكم
رجع يكمل أكله