جواز مزيف

في نفس الفترة شركة حسام بدأت تواجه مشاكل حقيقية في الإدارة
مش لأن نادية قررت تنتقم
لكن لأن حسام كان متعود إن في حد وراه بيراجع التفاصيل ويلاحظ الأخطاء ويحل الخلافات قبل ما تكبر
لما بطلت أعمل ده ظهرت المشاكل اللي كانت متغطية

عميل كبير اعترض على بند في عقد
ومشروع اتأخر بسبب سوء تنسيق
واجتماع مهم اتلغى لأن حسام ما كانش مجهز المستندات المطلوبة
وفي كل مرة كان بيتصل بيا
ـ نادية إنتي فاكرة ملف العقد القديم فين؟ـ اسأل إدارة الشركة يا حسام

ـ طب مين كان مسؤول عن التواصل مع العميل؟ـ موجود في أرشيف المراسلات
ـ إنتي عارفة إني محتاج مساعدتك
كنت برد بنفس الجملة
ـ أنا مش مسؤولة عن إدارة الشركة دلوقتي
لحد ما في يوم اتصل بيا وهو منفعل جدًا
ـ إنتي بتعملي كل ده عشان تنتقمي مني؟

قلتله
ـ أنا ما عملتش حاجة يا حسام غير إني بطلت أشتغل مكانك
قال
ـ إنتي عارفة إنك كنتي سبب كبير في نجاحي
سكت لحظة بعد ما قالها
لأن دي كانت أول مرة يعترف فيها بحاجة زي دي

لكن الاعتراف جه متأخر جدًا
قلتله
ـ كنت بتعرف ده وإنت بتضحك عليا قدام صحابك؟ما ردش
كملت
ـ أنا مش همنعك تنجح ولا هتمنى لك الفشل لكن مش هفضل مسؤولة عن حياة راجل مش شايف وجودي غير وقت ما يحتاجني
قفلت المكالمة
وقعدت أفكر في الفرق بين إني أكون مهمة في حياة حد وإني أكون مفيدة له

حسام كان محتاجني
لكن الاحتياج مش هو الحب
والاعتماد على شخص مش معناه إنك بتقدره
بعد شهور من الإجراءات والمراجعات وصلنا لاتفاق انفصال مكتوب بعد ما اتراجعت حقوقي والتزامات كل طرف

ما كانش سهل
حسام حاول أكتر من مرة يغير بنود الاتفاق
لكن داليا كانت بتراجع كل نقطة وأنا ما كنتش بوافق على حاجة مش فاهمها
وفي الآخر تم الطلاق بشكل قانوني
يومها خرجت من مكتب المحامي وأنا حاسة بخفة غريبة
مش فرحة انتصار

ولا شماتة في حسام
مجرد إحساس إن الحمل اللي كنت شايلته على صدـ,,ـــري بقاله سنين بدأ يخف
ركبت عربيتي وروحت بيت أختي
أول ما شافتني حــ,,ـــــضنتني وقالت
ـ خلصتي يا نادية؟ضحكت وقلت
ـ أيوه خلصت
بصتلي وقالت
ـ إنتي كويسة؟

فكرت شوية وبعدين رديت بصدق
ـ مش عارفة لسه بس أنا أحسن من امبارح
عملتلنا قهوة وقعدنا نتكلم عن حاجات بسيطة
عن الشغل
عن السفر
عن الكتب اللي كنت بحب أقراها وبطلت
عن الحاجات اللي أجلتها عشان كنت دايمًا مستنية حسام يفضى أو يوافق أو يبقى مزاجه حلو

وفي الليلة دي نمت من غير ما أبص على الموبايل كل عشر دقايق عشان أشوف إذا كان بعتلي رسالة
بعد الطلاق بدأت أرجع لحياتي واحدة واحدة
استأجرت شقة صغيرة قريبة من شغلي القديم
ما كانتش فخمة زي البيت اللي عشت فيه مع حسام لكنها كانت بتاعتي أنا
اخترت الستائر بنفسي